Naisingasing iti House of Representatives ti panagsukimat wenno panagadal ti kongreso kadagiti awan dokumentona a benepisiario ti voucher program ti Department of Education (DepEd) Senior High School (SHS).
Sigun kenni House Assistant Majority Leader Jil Bongalon ti Ako Bicol party-list, rumbeng a mangisayangkat ti House Committee Basic Education and Culture Good Government ken Public Accountability iti motu proprio inquiry iti mapapati a kaadda dagiti “ghost beneficiaries,” nga adda sipud pay idi 2016.
Itay laeng nabiit,imbutaktak ni Department of Education Secretary Sonny Angara a naduktalan nga adda dagiti ghost beneficiaries ti nasao a programa iti sangapulo ket dua a pribado a pagadalan iti siam a division babaen iti panangisubmitir dagitoy iti bogus a listaan dagiti nag-enrol.
Mapatta-patta a dumanon iti P52 million ti naawan a kuarta ti gobierno manipod iti School Year 2023 agingga 2024.
Ti SHS voucher program, ket mangipapaay ti tulong pinansial kadagiti kualipikado nga estudiante a kayatna nga agadal iti pribado a senior high schools nga inyam-ammo ti Department of Education tapno makessayan dagiti agad-adal iti parapubliko nga eskuelaan, ken mapalawa dagiti gundaway iti edukasion, maragpat ti ideal a ratio ti mannursuro ken estudiante ken ma-institusionalize dagiti espesial a track a maitunos kadagiti benepisiario wenno estudiante.
