BAGUIO CITY – Inkalintegan ti kapitan ti Ambuclao, Bokod, Benguet ti panaka-impound dagiti baka a nagkatang-katang iti masakupan daytoy a barangay.
Sigun kenni Punong Barangay Monroe Galasgas, sangapulo ket walo a baka ti tiniliw ken inkulongda iti astray animals impounding area ti barangay gaputa nakalubos dagitoy a magmagna iti kalsada.
Kinunana nga adda ti ordinansa a mangipalpalubos iti panaka-impound dagiti agkatang-katang a dingwen kadagiti publiko ken pribado a lugar sadiay nga isu ti nagbasaranda.
Inayonna a nakalanad iti nasao nga ordinansa a mamulta dagiti agtagikua kadagiti dingwen gapu iti panangbaybay-an dagitoy kadagiti tarakenda a posible a mangitunda ti aksidente kadagiti kalkalasada ken makadadael kadagiti mula.
Immuna iti dayta, adda ti naiuman a nagkatang-katang a baka iti depaar ti Ambuclao Road a nangitunda iti trapiko ken aksidente kadagiti lugan nga agdaldalyasat sadiay.
