Inyunay-unay ni Dr. Donnabel Panes, City Health Services Officer iti siudad ti Baguio nga awan ti pagdanagan ti publiko seknan iti panagaramatda kadagiti ukay-ukay wenno wagwag a bado nupay mabalin a maiyakar ti sakit a monkeypox babaen kadagiti bado.
Iti naipatungpal a press conference itay nabiit, impakaamo ni Dr. Panes a mabalin a maikkat dagiti bakteria kadagiti bado babaen iti panagaramat iti disinfectants ken pananglaba kadagiti nasao a bado sakbay a maaramat dagitoy.
Inlawlawag ni Dr. Panes ti nasao a banag kalpasan nga impeksa dagiti sumagmamano nga indibidual ti damag seknan kadagiti magatgatang nga ukay-ukay a bado wenno wagwag.
Maipalagip nga itay laeng nabiit ket dumanen iti uppat a kaso ti monkeypox ti nailista iti siyudad ti Baguio.
Nupay kasta, agtultuloy latta ti panagpalagip dagiti otoridad iti publiko nga obserbaranda latta ti standard health protocols kas iti panag-ugas iti ima, liklikan ti close skin-to-skin contact ken agaramat iti long sleeves tapno maprotektaran.
Malaksid metlaeng iti dayta, naipeksa ni Dra. Panes a rumbeng nga agpacheck-up a dagus dagiti umili apaman nga adda ti marikna dagitoy a sintomas ti mpox kas iti panateng, sakit ti bagbagi, ken rashes.//Bombo Genzel Depayso
