BAGUIO CITY – Tarigagay ti Commission on Higher Education (CHED)-Cordillera a mabakunaan amin dagiti manursuro ken estudyante a karaman kadagiti innem a pagadalan iti rehiyon a mangisaysayangkat iti limited face to face classes.
Mamati ni CHED-CAR Regional Director Dr. Demetrio Anduyan Jr. a babaen iti daytoy a wagas ket maipasigurado a natalged ti salun-at dagiti maseknan nga indibidual kabayatan ti panagadal.
Kinunana a nabakunaanen kontra COVID-19 dagiti sumagmamano nga estudyante ken manursuro bayat a nagkedked met dagiti daduma.
Nupay kasta, impettengna nga respetarenda latta ti panagkedked dagiti maseknan nga indibidual la ketdi ipasiguradoda a surotenda dagiti minimun public health standard.
Maipalagip a nangrugin ti limited face to face classes kadagiti innem a pagaladan iti rehiyon ngem dagiti laeng medical allied courses pakairamanan ti Saint Louis University, University of Baguio, University of the Cordilleras, Easter Colleges, Cordillera Career Development College ken Benguet State University.
