Inkari ni President Ferdinand R. Marcos Jr. nga adalenda a nalaing ti singasing para iti otonomiya iti rehiyon Cordillera.
Bayat ti ambush interview kenkuana idiay probinsia ti Apayao, nadamag daytoy nu ideklarana kas “urgent” ti nasao a singasing a mangikagumaan ti otonomiya ti rehiyon Cordillera.
Sigun iti presidente, adda iti konstitusional a saludsod daytoy a kas ti Autonomous Region in Muslim Mindanao a nagbalin a Bangsamoro Autonomous Region in Muslim Mindanao.
Ngem nupay kasta, impasigurado nga adalenda a nalaing daytoy.
Sumagmamano gamin a lokal a dadaulo ti mangkidkiddaw ti suporta manipud kenni President para iti pannakaipasa ti gakat a mangidurduron iti otonomiya ti rehion.
Iti agdama, “pending” wenno naisardeng paylaeng iti pannakatalantan ti House Bill 3267 iti Kongreso.
Sigun kadagiti “proponents” wenno mangidurduron para iti otonomiya, ad-adda a mapasayaat iti panagdur-as iti Cordillera apaman a maipasa daytoy.
