BAGUIO CITY – Kidkiddawen ti lokal a gobyerno ti Baguio ti panangilaylayon ti Land Transportation Franchising and Regulatory Board (LTFRB) iti panawen iti panagipila dagiti nagduduma a transport groups ditoy Baguio iti aplikasyonda para iti consolidation wenno panagbalinda a korporasyon wenno kooperatiba.
Nailanad iti Resolution No. 285, series of 2021 a kadagiti napalpalabas a konsultasyon ket rimwar a nasken nga ikonsidera ti LTFRB-Cordillera dagiti serbisyo nga ipapaay dagiti kooperatiba iti publiko ken saan laeng a ti pagbiagan dagiti apektado a transport cooperatives.
Dinakamatda a nasken nga ipaayan ti LTFRB iti provisional authority dagiti nakatungpal iti consolidation ken dagiti saan a nag-consolidate iti prangkisa tapnu agtultuloy ti operasyon dagitoy ken maipaayan iti kalidad a serbisyo ti transporasyon ti publiko.
Immuna iti daytoy, nagsurat ti Mines View Gibraltar Transport Cooperative iti City Council ken kiniddawda ti umno a panakiballaet ti konseho tapnu makumbinsir ti Central Office ti LTFRB ken maipalubos ti panangakseptar ti LTFRB-Cordillera iti aplikasyon dagitoy para iti consolidation dagiti lugan nga addaan ruta a Mines View Plaza a naipila kalpasan ti March 31, 2021 a deadline ti Application for Consolidation iti PUV Modernization Program.
