Impeksa ti Philippine National Police a dakkel ti nagbalin a papel dagiti wanted posters nga impablaak dagitoy para iti panakaarestar ni Pauleen Canada idi kalman, ti maysa kadagiti kadua ni Kingdom of Jesus Christ founder Pastor Apollo Quiboloy gapu iti kaso dagitoy nga Anti-trafficking.
Maibasar iti report, nakemmeg ni Canada idiay Davao City kalpasan a naipakaamo ti tip iti Department of the Interior and Local Government (DILG) idi Huwebes.
Natakuatan dagiti otoridad a dua a kilometro laeng ti distansya daytoy iti regional office ti Davao Police.
Sigun iti Department of the Interior and Local Government (DILG), ti panakaidiaya ti P1 million a gunggona para iti makaipaay iti tip wenno impormasyon kenni Canada ti nagbalin a kangrunaan a factor para iti panakaarestar daytoy.
Kinuna ni Department of the Interior and Local Government (DILG) Secretary Benhur Abalos a nakita ti informant ti babai a kaing-ingas dagiti naipablaak kadagiti wanted persons rason nga impakaammona daytoy.
Iti sabali a bangir, mamati ti gobyerno a dagiti daduma pay a fugitives ket adda iti pagilian nu pay kasta saanda nga ik-ikkaten ti posibilidad a mabalin a nagturongda iti sabali a pagilian.
Impanamnama met ni Abalus a magun-od ti hustisya iti kamaudiannana.//M
