BAGUIO CITY – Agtultuloy ti panangipaay ti opisina ti kongresista ti Baguio iti tulong kadagiti frontliners ditoy siudad ken kadagiti umili kagiddan ti krisis nga ituntunda ti COVID-19 pandemic.
Iti interview ti Bombo Radyo Baguio kenni Baguio Representative Mark Go, masansan ti panangiwarasda kadagiti bagas, natnateng manipud kadagiti mannalon ti benguet ken dadduma pay a taraon kadagiti umili ti siudad.
Dinakamatna nga agarup naturong ken naiwarasandan amin a barangay ti siudad malaksid pay kadagiti nagduduma a grupo kas kadagiti senior citizens, drivers dagiti jeep ken dadduma pay.
Innayonna a nakaipaay metten ti opisinana iti adu a body suits, booties, face mask ken dadduma a protective equipment kadagiti nagduduma nga ospital ditoy Baguio, para kadagiti doktor ken nars.
Imbingayna a dagiti nasao a protective equipment ket nagtaud kadagiti pagayamna iti semi-conductor industry.
Inkarina pay ti agtultuloy a panangitedna iti kasapulan dagiti frontliners gapu met iti agtultuloy a panagserbi ken panang-agasda kadagiti biktima ti COVID-19 tapnu kanayon a maipasigurado ti proteksion dagitoy.
Impanamnama ti kongresista a kanayon a nakalukat ti opisinana kadagiti residente ti siudad nga agkaspaulan ti tulong.
