Manarimaan iti panakikoordinar dagiti barangay officials iti BarangayPico seknan iti panakaipaay ti safety equipment para kadagiti Toyong Neighborhood Farmer’s Association tunggal agdalus dagitoy iti 1st Pico bridge iti nasao a barangay.
Iti panakiuman ti Bombo Radyo kenni Delmer T. Shagol, kagawad sadiay Brgy. Pico, manarimaan ti panagplanoda para iti panakaipaay ti equipment wenno kagawaan kadagiti mannalon tapno mamintinir ti kinatalged ti salun-at dagitoy.
Maipalagip nga itay laeng nabiit ket naobserbaran nga awan ti umdas a kagawaan dagiti mannalon bayat ti panagdalus dagitoy iti nasao a karayan kas iti facemask a nasisita koma gapu iti saan a nasayaat nga angot iti pagdaldalusanda.
Innayonna a makarikrikna daytoy iti asi kadagiti mannalon a binulan nga agdaldalos iti nasao a karayan gapu ta agtatalinaed a saan pay nasursurwan dagiti residente ken dagiti business establishment owners seknan iti umno a panagibelleng dagitoy iti basurada.
Gapu iti dayta, umap apela manen daytoy kadagiti residente iti Barangay Pico a makitinnulongda iti panangmintinir ti kinadalus ti aglawlaw nangruna iti masakupan iti 1st Pico bridge tapnu saanen a kasapulan pay nga agdalus dagiti mannalon iti nadakamat a karayan.
Sigun iti obserbasyon daytoy, ti kadawyan a pagapgapuan dagiti basura, mantika, ken motor oil ket kadagiti business establishments nga asideg iti nasao a creek.
Dinakamatna nga idi nagrikus dagitoy kadagiti nasao nga establisyimento kadua dagiti kameng ti La Trinidad Municipal Environment and Natural Resources Office ket agtaltalinaed nga adu ti naibelbelleng a basura sadiay.//Bombo Genzel Depayso
