BAGUIO CITY – Agtultuloy ti panangtulong dagiti OFWs sadiay Israel kadagiti kakadwada a naawanan ti trabaho gapu iti epekto ti COVID-19 pandemic.
Iti interview ti Bombo Radyo Baguio kenni Rex Merino, caregiver ken vlogger sadiay Jerusalem, Israel, kinunana nga agtultuloy latta ti trabahona bayat nga adu dagiti kakadwana a caregivers sadiay a naawanan ti trabaho.
Dinakamatna a dagiti OFWs naawanan ti trabaho ket agtaltalinaed laeng iti ayan ti apartment dagitoy.
Sigun kenkuana, dagiti organisasyon dagiti OFWs sadiay ket agit-ited iti tulong kadagiti apektado nga OFWs a miembro dagitoy kas iti grupoda sadiay Jerusalem a mangit-ited iti P1,000 kadagiti apektado a kadwada iti organisasyon.
Imbingayna met nga adda ti lima nga OFWs sadiay Israel a nagpositibo iti COVID-19 ngem naiturongen dagitoy iti maysa a hotel para iti quarantine ken maipapaay amin a pagkasapulan dagitoy.
Innayon pay ni Merino a dakkel ti multa dagiti makemmeg nga aglabsing kadagiti paglintegan ti lockdown sadiay a katukad ti agarup P80,000.
Sigun kenkuana, ita nga aldaw ket nangrugin ti in-inot a panaglukat dagiti restaurant sadiay ken mabalinen nga ag-ehersisyo iti 500-meter radius manipud iti pagnanaedan dagitoy.
