Imbilin iti International Criminal Court (ICC) Pre-Trial Chamber I ti panakaipasidong ni sigud a president Rodrigo Duterte iti medikal nga eksaminasyon tapno maduktalan nu kabaelannan ti umatendar iti confirmation of charges.
Dagiti panel of experts ket manamnama a mangipaay iti assessment seknan iti lebel wenno kinakaro ti medikal a kondisyon a sagsagabaen ti sigud a presidente a mabalin a makaapektar iti panangsurot ken panangawatna iti pre-trial proceedings, ken nu adda dagiti special measures wenno adjustments a mairekomendar tapno marisut ti anyaman a medikal a kondisyon ni Duterte.
Dagiti manamnama a mangipatungpal iti eksaminasyon iti sigud a presidente ket pakairamanan dagiti eksperto iti forensic psychiatry,neuropsychology, ken geriatric and behavioral psychology nga addaan metlaeng iti kapadasan a mangsukimat iti kondisyon iti maysa a natataengan nga indibidwal a kasapulan a sumango iti judicial proceedings.
Maipalagip a kiniddaw ti kampo ni Duterte iti international tribunal nga itantan ti nasao a panagdengngeg gapu ta ti sigud a presidente ket “unfit fot trial.”
Ti confirmation of charges ket immunan a naituding idi September 23 ngem pinatgan ti mayorya iti chamber ti panakaitantan daytoy iti saan pay nadakamat a petsa.
Ti sigud a presidente ket nakabalud wenno naka-detain ita iti detention facility iti ICC idiay The Hague, Netherlands gapu iti kaso daytoy a crime against humanity mainaig iti kampanya kontra iligal a droga kabayatan ti administrasyonna.
