BAGUIO CITY – Nangrugin inton bigat ti panakaipatungpal ti health break dagiti walo a distrito iti Schools Division Office of Benguet ken agpaut daytoy agingga inton Martes.
Sigun kenni Benguet Schools Division Superintendent Gloria Buya-ao, karaman ditoy dagiti pagadalan iti Atok, Bokod, Buguias, Itogon District 2, La Trinidad, Mankayan, Sablan ken Tuba.
Kinunana a kasaruno daytoy ti panagngato ti kaso ti COVID-19 iti lokalidad ken para metlaeng iti seguridad ti salun-at dagiti estudyante ken mannursuro dagiti pagadalan kadagiti nasao a munisipyo.
Innayonna a naobserbaran kadagiti nasao a distrito ti nangato a kaso ti COVID-19 ken kiniddaw a mismo dagiti maseknan a district supervisors ti health break iti masakupan dagitoy.
Inlawlawagna a kabayatan ti health break ket awan ti maipaay nga aktibidad mainaig iti panagadal ken panagsuro kadagiti amin a mannursuro ken estudyate kadagiti nasao nga aldaw.
Gapu iti daytoy, mabaliwan ti schedule ti school calendar dagiti walo a distrito isut gapuna nga ileppasda ti school year 2021-2022 inton July 1 imbes nga inton June 24.
Kabayatanna, dagiti met distrito ti Bakun, Itogon District 1, Kabayan, Kapangan, Kibungan ken Tublay a saan a mangipatungpal ti health break ket suruten da latta ti regular calendar schedule ti agdama nga school year.
Maipalagip nga naobserbaran ti in-inot a panagngato ti kaso ti COVID-19 iti Benguet a rason iti panakaipasidong ti probinsia iti Alert Level 3 itay laeng nabiit.
