BAGUIO CITY – Marugianen inton Abril 15 ti implementasyon pammilin kontra iti panagngalngal ti moma kadagiti amin a drivers dagiti parapubliko a lugan ditoy Rehion Cordillera.
Iti panakiyuman ti Bombo Radyo, kinuna ni Department of Transportation (DOTr)-Cordillera Regional Director Engr. Robert Allan Santiago a maipawil ti panagngalngal ti moma dagiti nasao a drivers kalpasan ti panakaipablaak daytoy kadagiti pagiwarnak ken ti panakaipaay ti kopya ti pammilin kadagiti drivers.
Kinunana nga umuna a maipatungpal ti pammilin ditoy siudad ti Baguio ken sadiay Benguet.
Innayonna a maipatpatungpal ti information drive seknan iti pammilin iti dadduma a paset ti Cordillera.
Kagiddan iti daytoy ket imbilin ni Engr. Santiago ti panangpatalinaed dagiti drivers dagiti parapubliko a lugan iti kinadalus ti langada tapno agtalinaed met ti panagbalin a komportable dagiti pasahero dagitoy.
