BAGUIO CITY – Posible a maisubli manen ti border restrictions iti Baguio, La Trinidad, Itogon, Sablan, Tuba and Tublay (BLISTT) Area mangrugi kuma ita nga aldaw, December 27 agingga inton tapos, December 31.
Sigun kenni Mayor Benjamin Magalong, babaen iti daytoy ket malimitaran dagiti non-essential travels ken maprebentaran ti killaat a panagngato ti kaso ti COVID-19 kasaruno ti killaat a panagngato dagiti kaso ti nasao a sakit iti sumagmamano a munisipyo ti Benguet idi kanikadua.
Maibasar iti inisyal a plano ni Mayor Magalong, masurot dagiti paglintegan a naituding idi immuna a naipatungpal ti border restrictions iti BLISTT Area idi December 16 agingga December 22.
Dinakamatna nga immannugot metten da Itogon Mayor Victorio Palangdan, La Trinidad Mayor Romeo Salda ken Tublay Mayor Armando Lauro iti panakaipatungpal manen ti border restrictions.
Kinunana nga ur-urayenna laengen ti pammalubos met da Sablan Mayor Manuel Munar ken Tuba Mayor Clarita Sal-ongan seknan iti nasao a panggep.
Inaklon met ni Mayor Lauro a pakaseknanna laeng ita ti panangipaka-ammona kadagiti umili ti Tublay iti nasao a banag nangruna ta awan pay ti face-to-face a konsultasyon seknan iti nasao a panggep.
Maipalagip nga iti border restrictions iti BLISTT Area ket masapul nga iparang dagiti dumalan kadagiti border checkpoints ti valid government issued ID kas pammaneknek iti address ken ti health declaration form dagitoy.
