BAGUIO CITY – Kidkiddawen ita ti liga dagiti asosasyon dagiti mannalon sadiay La Trinidad Vegetable Trading Post ti panangituding ti gobyerno iti aldaw a panagbakuna kadagiti amin a truck drivers ken helpers nga agibi-biyahe kadagiti nateng.
Sigun kenni Agot Balanoy, dadaulo ti Benguet Farmers Cooperative, daytoy ket gapu iti panakaikalikagum ti vaccination cards wenno negatibo a COVID-19 test result kadagiti border checkpoints.
Gapu iti daytoy, kinunana a rumbeng a mangilatang ti lokal a gobyerno ti La Trinidad iti maysa wenno dua nga aldaw para iti panakabakuna dagiti nasao nga indibidual.
Kinunana a babaen iti daytoy ket saan unay a magastosan dagiti truck drivers iti panagpaipasidongda iti antigen test nga agpaut laeng iti 72 hours ken aggatad iti P500.00- P800.00 wenno RT-PCR test nga aggatad iti P3,000.00-P5000.00.
Innayonna nga adu a vegetable truck drivers ken helpers ti agtartarigagay a mabakunaan kontra COVID-19 agsipud ta daytoy ket para iti kinatalged iti salun-at da ken kasapulan daytoy kadagiti border checkpoints.
Immuna iti daytoy, kiniddaw pay ti grupo ti panakailaksid dagiti cargo truck drivers ken helpers kadagiti nasao a pagalagadan kadagiti quarantine checkpoints.
