BAGUIO CITY – Kinuwestionaran ti lokal a konseho ti Baguio ti panagkolektar Baguio City Market Authority (BCMA) ken ti City Environment and Parks Management Office (CEPMO) iti parking fees kadagiti paradaan iti paset ti Wright Park agingga iti Botanical Garden.
Sigun iti dadaulo ti Committee on Laws iti konseho, iligal ti panagkolektar iti parking fees kadagiti nasao a disso gaputa saan daytoy a saksakupen ti aniaman nga ordinansa.
Kinunana a gapu iti daytoy ket imbitaranda dagiti opisyales ti BCMA ken CEPMO, dagiti maseknan a barangay officials ken ti presidente ti asosasyon dagiti Pony Boys iti Wright Park.
Innayonna a babaen iti panakaimbitar dagiti nasao nga indibidual ket malawlawagan ti isyu, partikular ti katulagan ken resolusyon a nabukel para iti panakakolektar dagiti parking fees kadagiti nasao a disso nga awanan ti pammalubos manipud iti lokal a konseho.
