BAGUIO CITY – Impetteng ni PNP Chief Gen. Guillermo Eleazar nga umno laeng a napadayawan ti Regional Drug Enforcement Group – Special Operation Unit (RDEG-SOU) ti Police Regional Office Cordillera (PROCOR) iti baet ti panakairaman ti dua a sigud a personnel ti yunit iti kontrobersyal a Lagman Case.
Sigun iti PNP Chief, napadayawan ti nasao nga opisina ti PROCOR gaputa inaramidda ti trahahoda.
Inlawlawagna a naikkaten iti serbisyo dagiti dua a personnel ti RDEG a nairaman iti Lagman Case.
Inyunay-unayna a sabalin dagiti personnel a mangbukbukel iti nasao nga yunit ti pulisya.
Maipalagip a nairaman ti dua a personnel ti RDEG ti PROCOR iti panakadukot ken panakapapatay daydi Harjan Lagman ti Baguio City, no sadino, nadukot ken nasarakan laengen a bangkay nga awanan ti ulo sadiay Tublay, Benguet idi November 2020.
Nupay kasta, impetteng ni Gen. Eleazar a saan a daytoy ti mangipakpakita nga awan ti naaramidan ti nasao a yunit ti pulisya.
Sigun kenkuana, napasungbat dagiti personnel nga adda pakainaiganna iti nasao a kaso.
Maipalagip a winaswas ti liderato ti PROCOR ti Regional Drug Enforcement Unit (RDEU) gapu iti insidente.
Immuna iti daytoy, naipaayan ti pammadayaw kas Best Regional Operation Support Unit ti RDEG-SOU ti PROCOR gapu kadagiti balligi nga operasyonda kontra iti iligal a droga kabayatan ti panagsarungkar ti PNP Chief sadiay PROCOR ita a lawas.
