Inlawlawag ni Engineer Bonifacio Dela Peña, Administrator iti Baguio City nga addan ti naaprubaran a pondo para iti Burnham Development a mangsaklaw metlaeng iti panakapasayaat iti Melvin Jones Grandstand.
Iti panakiuman ti Bombo Radyo kenni Engr.Dela Peña, imbinglayna a mai-download kuma laengin ti pondo nga inaprubaran ti Tourism Infrastructure and Enterprise Zone Authority (TIEZA).
Nupay kasta,kinuna ni Engr.DelaPeña a saan pay a naiyimplimintar daytoy gapu iti pandemya ken iti agdama ket maur-uray ti pakaammo ti nasao nga ahensya.
Iti baet ti panakitantan ti proyekto, impanamnama ti opisyal nga agtaltalinaed ti komitment dagitoy iti Burnham ken Melvin Jones development.
Maipalagip a bayat ti panakaipatungpal dagiti dua nga highlights iti 2025 Baguio Flower Festival ket naobserbaran ti napitak nga aglawlaw iti Melvin Jones, banag a binabalaw dagiti sumagmamano a nakakita iti daytoy.//Bombo Rob Dominguez
