BAGUIO CITY – Naitantan ti panakapirma ti Small Scale Mining Contract ti Loakan Itogon Pocket Miners Association (LIPMA) para iti operasyon dagitoy iti kaunaan a Minahang Bayan iti probinsia ti Benguet.
Sigun kenni Daniel Pay-an, maysa kadagiti board members ti LIPMA, naituding a mapirmaaan ti kasapulan a kontrata inton April 23 iti maangay nga special meeting ti Provincial Mining Regulatory Board (PMRB) ti Benguet.
Inlawlawagna a suksukimaten pay laeng ti PMRB ti linaon ti kontrata para iti naannayas a panagrugi ti operasyon ti Minahang Bayan.
Naamuan a 15 hectares manipod iti 64 hectares a naaprobaran a Minahang Bayan ti inaplikaran ti nasao nga asosasyon sadiay Loakan, Itogon.
Kinuna pay ni Pay-an a dagusda nga agrugi ti operasyonda iti kanito a balligi a maaprobaran ti aplikasyonda iti Small Scale Mining Contact inton April 23 kalpasan a nakaaladan iti dadduma kadagiti maikalkalikagum a permiso kas iti Environmental Compliance Certificate manipod iti DENR.
