BAGUIO CITY – Agdependar iti sitwasyon ti Baguio iti COVID-19 ti panakarambak ti Baguio Flower Festival wenno Panagbenga ita a tawen.
Sigun iti mayor ti siudad, ti agdama a sitwasyon ti siudad ti pagbasaranda no maituloy wenno saan ket maitantan ti pestibidad.
Dinakamatna a no saan a sumayaat ti sasaaden ti siudad mainaig iti pandemya ket maitantan ti selebrasyon ken no saan a matuloy inton sumaruno a bulan ti Pebrero ket posible a maituloy inton Marso.
Nupay kasta, inyunay-unayna a maituloy ti panakarambak ti Panagbenga 2022 kagiddan ti panakasurot dagiti paglintegan kas iti minimum public health standards.
Immunan a napagnumuan ti Baguio LGU ken ti Baguio Flower Festival Foundation Incorporated dagiti maaramid para iti pestibidad.
Imbinglay ti mayor a napagnumuanda a saan a maipatungpal dagiti crowd-drawing acvtivities kas iti grand street dance parade ken float parade bayat a maipangruna dagiti aktibidad para iti landscaping ken iti panakaital-o ti creativity.
