BAGUIO CITY – Nainget a masurot dagiti minimum health standards kontra iti COVID-19 apaman a maisayangkat ti limitado a face-to-face classes kadagiti 12 a pagadalan iti rehion Cordillera.
Impasigurado daytoy ni Commission on Higher Education (CHED)-Cordillera Regional Director Demetrio Anduyan Jr. iti panakiuman ti Bombo Radyo Baguio kenkuana.
Linawlawaganna a maisayangkat laeng ti limitado a face-to-face class kadagiti nasao a pagadalan no kasapulan dagiti estudyante ti ‘hands-on experience’ a matungpal laeng kadagiti laboratoryo.
Innayonna a magudgudwa dagiti estudyante a mapaayaban iti pagadalan para iti laboratory activities dagitoy tapnu matungpal ti social distancing kadagiti laboratoryo.
Sigun pay kenkuana, agtalinaed nga online ti panag-lecture ti mannursuro ken magiddanan ti modules ti panagadal dagiti nasao nga estudyante.
Inyunay-unayna met a sakbay a napalubusan ti limitado a face-to-face class iti health-related degree programs kadagiti 12 a pagadalan iti Cordillera ket nainget a naipasidong dagitoy iti umno a proseso sakbayda a naipaayan ti sertipikasyon para iti nasao a wagas ti panagisuro.
Naituding a sakbay nga umuneg dagiti estudyante iti laboratoryo ket dumalan pay dagitoy iti triage a naipasdek kadagiti maseknan a pagadalan, agpirmada ti health declaration form ken iti kanito nga adda dagiti estudyabte a makitaan ti sintomas ti COVID-19 ket dagusda a maiturong iti isolation rooms a nakasaganan kadagiti nasao a pagadalan.
Agbalin met a regular ti disinfection ken adda ti naimuntar a shower rooms a pagdigusan dagiti estudyante sakbayda nga aggawid wenno umuneg iti laboratoryo.
Impetteng pay ni Anduyan a saan a mandatory wenno kapilitan a mabakunaan kontra iti COVID-19 dagiti estudyante ken mannursuro nupay dinakamatna a napimpintas no nabakunaan dagitoy tapnu maipasigurado ti kinatalged ti salun-at dagitoy.
