Maipalpalagip kadagiti amin a kandidato nga adalen dagitoy a nalaing dagiti Commission on Elections (COMELEC) resolution ti COMELEC tapno adda ti basaran dagitoy iti panagkampanyada.
Iti panakiuman ti Bombo Radyo kenni Atty. Elenita Julia Tabangin-Capuyan, Provincial Election Supervisor 3 ti Office of the Regional Election Director, kinunana a nasken a maamoanda dagiti nagduduma a pagalagadan kas iti kontra bigay ti COMELEC gapu ta adda dagiti sigud a practice wenno maar-aramid a pagaammo kas ligal ngem saan gayam.
Inyunay-unay ni Atty. Tabangin-Capuyan, a dagiti ID nga addaan iti benepisyo, dagiti nagduduma a social services a maipapaay ket mabalin a maikonsidera kas vote buying.
Maiparit met ti panangipaay kadagiti tshirts, payong, ballpen wenno anyaman a banag nga addaan iti value gapu ta makapektar daytoy iti panagbotos dagiti botante.
Nupay kasta, kasapulan ti Commission on Elections nga adda ti agreklamo tapno mabalin nga agimbestigar dagitoy.
Kabayatanna, impakaamo ni Atty. Tabangin-Capuyan ti baro a resolution ti Commission on Elections nga “Anti discrimination and fair campaigning” no sadino tunggal indibidual ket rumbeng a marespeto rason a nasayaat a kitaen dagiti kandidato dagiti maibalbalikasda a pannarita wenno liklikan dagiti “foul words.”
Innayon pay ni Atty.Tabangin-Capuyan nga iti panagkampanya dagiti kandidato ket nasken a ti gastosen ti maysa a kandidato ket P3 tunggal botante no daytoy ket karaman iti political party bayat a no independent ket P5 tunggal botante.
Gapu iti dayta, rumbeng a maliklikan ti overspending.
