Agtaltalinaed a maiparit ti panagilako iti soft drinks ken junk food kadagiti pagadalan, sigun iti Department of Education (DepEd).
Sigun kenni Education Assistant Secretary Roger Masapol, siguraduen koma dagiti opisial ti pagadalan ti nainget a pannakaipatungpal ti pannakaiparit dagiti soft drinks ken junk food iti masakupanda a pagadalan.
Nakalanad iti Department of Education Order No. 13 nga impaulog ni sigud a Department of Education secretary Leonor Briones a maiparit ti panagilako iti soft drinks ken junk food kadagiti parapubliko a pagadalan iti intero a pagilian, a mangikagumaan a maitandudo ti nasalun-at a pannangan.
Para kenni Masapol, rumbeng a papigsaen ti DepEd ti school-based feeding program gaputa dakkel ti impaay ti gobierno a pondo.
Kabayatanna, ti school year 2025-2026 ket mangrugi inton June 16 ken agleppas inton March 31, 2026.
