BAGUIO CITY – Adalen ti lokal a konseho ti Baguio ti kiddaw ti maysa a pribado a kompanya para iti panangimuntarda iti light-emitting diode (LED) ken static billboards kadagiti nabigbig a lugar ditoy siudad.
Kasaruno daytoy ti panangiparang ti kompanya iti planoda a panakaimuntar dagiti nasao a billboards nga agserbi nga outdoor advertising platforms iti siudad.
Kinunada a libre nga aramaten ti lokal a gobierno dagiti nasao a billboards iti panangimpormar kadagiti umili mainaig iti sasaaden ti panawen, update iti sitwasyon ti trapiko, napapateg a paka-ammo ken dadduma pay.
Inkari pay ti kompanya a maipaay ti 10% a bingay ti lokal a gobierno iti kanito nga adda ti agpa-advertise kadagiti billboards.
Naamuan a permit nga agpaut iti 25 a tawen ti kidkiddawen ti nasao a kompanya iti lokal a gobyerno ken addan dagiti nabigbigda a lugar a mabalin a pakaimuntaran dagiti electronic billboards kas iti Magsaysay Road, Harrison Road ken Shanum Street.
Nupay kasta, tinubngar dagiti miembro ti lokal a konseho ti siudad ti kiddaw ti nasao a kompanya gaputa sigun kadakuada, adda ti ordinansa a saan a mapalubusan ti panakaimuntar ti permanente a billboards ken maipalubos laeng ti panakaimuntar ti billboard no adda ti napateg nga aktibidad ti Baguio.
