Patien iti Bureau of Fire Protection Cordillera a saan a nasayaat ti panagaramat kadagiti fire trikes para iti rehiyon Cordillera.
Mainaig daytoy kadagiti naipablaak iti social media maipapan iti panagaramat kadagiti fire trikes kadagiti sumagmamano a paset iti pagilian.
Sigun kenni Fire Superintendent Katherine Albino, Chief iti Public Information Section iti Operations Division iti BFP-CAR, ti fire trikes ket saan a maitutop para iti Cordillera gapu iti kasasaad dagiti lugar ken dalan iti rehiyon.
Impeksana a ti kaaduan kadagiti dalan iti rehiyon ket nangato, nailet, ken narigat a pagdalyasatan dagiti lugan, isu a mabalin a maapektaran ti panagserrek dagiti fire trucks kadagiti lugar a kasapulan ti tulongda.
Gapu iti daytoy, masapul a maikonsiderar ti kasasaad ti tunggal lugar iti panangpili kadagiti umiso a kagawaan para iti panagresponde kadagiti insidente ti uram.
Impeksana met a ti panangpasayaat iti response capability ti ahensya ket maysa kadagiti kangrunaan a prioridadda tapno maipaay ti napartak ken epektibo a serbisyo kadagiti residente.
Inlawlawagna a makatulong iti daytoy dagiti 4×4 fire trucks para iti panagresponde kadagiti emerhensya ken iti panangipaay iti tulong iti publiko, nangruna kadagiti lugar a narigat a danunen.
Kabayatanna, nagkari met ti BFP-CAR iti publiko nga aramiden ti ahensya ti amin a kabaelanna tapno maipaay ti kasapulan a tulong, bayat a tungpalen dagiti miembro ti ahensya dagiti responsibilidad ken mandato dagitoy.
Impeksana a manamnama ti nabara a panawen gapu iti posible nga El Niño, isu a ginuyogoyna ti publiko a liklikanda ti panaguram, nangruna kadagiti open spaces, tapno maliklikan ti panagrugi ti uram.
Inawisna dagiti residente a dagus nga ipakaammo kadagiti bumbero wenno kadagiti lokal nga otoridad no adda ti makita dagitoy nga agrugrugi nga uram tapno napartak ti panagresponde ken maliklikan ti panagramaramam daytoy.//Bombo Khey Reparip
