BAGUIO CITY- Pagyamyamanan ita ni Benguet Congressman Eric Go Yap ti waragawag ni President Ferdinand Bongbong Marcos Jr. a maipangruna ti rehabilitasyon ti Kennon Road iti sidong ti public-private partnerships (PPP).
Immunan nga inraman ti DPWH ti rehabilitasyon ti Kennon Road iti sidong ti PPP malaksid pay iti rehabilitasyon ti Expressways sadiay Cebu ken sadiay Nueva Ecija.
Sigun iti DPWH, ti rehabilitasyon ti Kennon road ket aggatad iti P12.45-B.
Ti nasao a kalsada ket maysa kadagiti kangrunaan a pagnaan nu agturong iti probinsiya ti Benguet.
Inaramid daytoy dagiti Amerikano idi 1900s, nu sadino naipaspasidong daytoy iti rehabilitasyon sipud nadadael idi 1990 Killer Quake.
Naan-anay a nairikep daytoy kadagiti motorista kabayatan ti pandemya ken nailukat idi Abril uno idi napan a tawen.
Malaksid iti naan-anay a panakatarimaan ti Kennon Road, isaksakad metlaeng ni Congressman Yap ti panakapasayaat dagiti kangrunaan a maar-aramat a kalsada iti Benguet.
Karaman ditoy ti panakaimuntar dagiti safety devices ken road barriers a mangpakdaar kadagiti motorista ken biaheros.
