Impetteng ni Attorney Elenita Julia TabanginCapuyan, Provincial Supervisor iti Commission on Elections- Benguet nga alas otso iti agsapa agingga alas cinco iti malem laeng nga iyakomodarda dagiti mangipila iti Certificate of Candidacy(COC).
Gapu iti dayta, maiyunay-unay kadagiti agpangpanggep nga agngayangay a masapol a personal nga adda dagitoy kadagiti lugar a pangipilaanda iti certificate of candidacyda tapno maliklikan a ma-waive wenno ma-forgo dagitoy kaspangarigan maliwayanda ti agpakita apaman nga awagan dagiti election officer ti nagnaganda.
Kagiddan dayta,inlawlawag ti opisyal nga awan ti maangay a panakailaylayon iti oras iti panangipila iti COC rason a pinaaynan ti kapanunutan nga agingga alas dose iti tengga iti rabii nga iyakomodarda dagiti agngayangay.
Kabayatanna,dinakamat ni Atty.Capuyan a tallo laeng ti mapalubusan a mangkadwa kadagiti mangipila iti Certificate of Candidacy maitunos iti pagalagadan nga impaiyulog iti Commission on Elections(COMELEC).
Kaspangarigan nasursurok ngem tallo ti mangkadwa kadagiti agngayangay iti Baguio City,agtalinaed dagiti daduma iti ruar ti Baguio Convention Center (BCC).
Iti met Benguet,mabalin latta a sumrek iti compound a pakaangayan iti COC filing dagiti mangkadwa kadagiti agngayangay.
Iti sabali a bangir, mapalubusan dagiti agpangpanggep mangipatungpal iti performace kas iti panaggangsa ken daduma pay kas paset ti “freedom of expression” laketdi saan a makariribuk wenno makaitunda iti problema iti panangipila dagiti agngayangay kadagiti COC dagitoy.//Bombo Rob Dominguez
