Impakaamo ita nga aldaw ti simbaan a Kingdom of Jesus Christ a ti panangiserbi ti warrant of arrest ket saan a nainkalintega kontra kenni fugitive Pastor Apollo Quiboloy.
Daytoy ket kas sungbatda ti addang nga impatungpal ti Philippine National Police’s Criminal Investigation and Detection Group (PNP-CIDG idi kalman nu sadinno, nagturong dagiti kameng ti pulisia iti KOJC compound idiay Davao City tapno iserbi ti warranat of arrest kenni Quiboloy.
Ti nasao a pastor ket sumangsango gamin iti child prostitution, sexual abuse, ken dadduma pay.
Sigun pay iti nasao a simbaan, maikontra iti linteg ti panagserrekda iti compound ti aw-awaganda a Prayer Mountain ken Glory Mountain idiay Barangay Tamayong, Davao City kasta met iti sanikua ti simbaan idiay Kitbog, Sarangani Province.
Gapu iti dayta, kinondenarda ti addang nga inyemplementar ti warrant of arrest.
Impaganetget ti simbaan a saan a naotorisaan nga agusar ti puersa wenno saan nga agtulong iti pagalagadan ti panagarestar dagiti otoridad .
Dinakamat ti simbaan a tallo manipod kadagiti miembro dagitoy ket nadangran.
Malaksid iti dayta, siam kadagiti miembro ti nasao a simbaan ket nakemmeg ken pinosasan dagiti kameng ti pulisia gapu iti rason a maatap a panagawitda ti bolo bayat ti raid.
Iti agdama, manarimaan ti panangasikasoda tapno mangipila ti reklamo kontra kadagiti opisial ti pulisya.
