BAGUIO CITY- Kidkiddawen ti Persons with Disability Affairs Office (PDAO) iti Mayor’s Office ti panangpasayaat ti Commission on Elections (COMELEC) iti sistema para iti panakipaset dagiti PWDs iti masungad nga eleksion.
Iti eksklusibo a panakiuman ti Bombo Radyo Baguio, inaklon ni Samuel Aquino iti PDAO a saanda a napnek iti serbisyo ti COMELEC idi napan nga eleksion.
Kinunana a daytoy ket agsipud ta iti naglabas nga eleksion ket kinolektar laeng dagiti personnel ti COMELEC ti balota dagiti PWDs isu’t gapuna a saanda a napadasan a mangiserrek kadagiti balotada kadagiti Vote Counting Machines (VCMs).
Dinakamatda a kayat da a ma-validate manen dagiti balotada sakbay a bilangen ti makina ti butos dagitoy.
Iti baet daytoy, agyamyaman ni Aquino iti COMELEC-Baguio gapu ta saanda nga agliwliway a mangipapaay iti espesyal a serbisyo kadagiti PWDs kas iti free polling precincts ken special registration a naangay idi Setyembre 11.
Makikokoordinar metten ti PDAO iti poll body seknan iti maipatungpal a restriksion para kadagiti PWDs inton aldaw ti eleksiyon.
