BAGUIO CITY – Nailawlawag ti pagsayaatan ti Cordillera nu magun-od ti maisaksakad nga otonomiya.
Iti panakiyuman ti Bombo Radyo kenni Social Preparation of Cordillera into an Autonomous Region (SPCAR)-National Economic and Development Authority (NEDA) Atty. Delmar Cariño, maysa kadagiti karit iti pananggun-od iti otonomiya ket ti kinakurang ti pannakaawat dagiti umili iti konsepto daytoy rason a masapol a maipasagipsip kadakuada babaen ti panangisayangkat ti massive Information, Education and Communication (IEC) Campaign.
Sigun kenni Cariño, tarigagay ti otonomiya a magun-od ti panangbigbig iti naisangsangayan a kultura, tradisyon, ken ugali ti Cordillera kasta met tapno maipaayan ti karbengan nga agdesisyon ken agplano a bukbukodna para iti panagdur-as daytoy.
Malaksid iti dayta, imbinsa-binsa ni Atty. Cariño dagiti benepisyo a mabalin nga ipaay ti otonomiya kas ti panakaipreserba ken panakaprotektar ti pakabigbigan ti Cordillera.
Impasiguradona pay a saan a mapasamak ti reverse discrimination iti kanito a maipasa ti otonomiya kas maysa a linteg agsipud ta panggep daytoy ti inclusive growth para iti amin karaman dagiti indibidwal nga addan makatawen nga agnanaed iti rehiyon.
Nupay kasta, imbinglay ti attorney a ngimmaton ti level of awareness dagiti umili iti konsepto daytoy ken namnamaenna a maipasa ti panagbalin ti Cordillera kas maysa nga autonomous region iti maikatlo a gundaway a maisingsingasing kadagiti nangangato nga opisina iti pagilian.
Kabayatanna, kalpasan nga aprubaran ti lower chamber ken upper chamber ti House Bill (HB) 3267, masapol ti pirma ti presidente sakbay nga agbalin daytoy a linteg.
Kalpasan iti dayta ket masapol a maiwaragawag ken maipakaawat daytoy iti sibubukel a pagilian tapno magun-od ti pammalubos iti plebesito.//Rob Dominguez
