BAGUIO CITY – Agtultuloy ti imbestigasyon ti pulisya tapno maduktalan ti rason ti pannaka-uram ti maysa a balay sadiay Rockyside 2, Lubas, La Trinidad, Benguet a nagresulta iti pannakatay ti maysa a 4-anyos nga ubing.
Sigun ken ni Police Maj. Cleff Vencio, hepe ti La Trinidad Municipal Police Station, biktima iti aksidente ti Kenwayne Pastrana Dechoso, 4 anyos ken residente ti nadakamat a lugar.
Naduktalan iti imbestigasion ti La Trinidad MPS nga inbati ni Kenneth Dechoso ti anakna a ni Kenwayne Pastrana Dechoso iti uneg ti balayda.
Kalpasanna ket nakita laengen dagiti kaarrubada nga adda ti asuk nga agtataud iti balay da Dechoso ken nakumpirmar a maur-uram ti balay.
Inkagumaan dagiti residente a sinebseban ti apoy agingga a nakasangpet dagiti otoridad.
Pinadas met dagiti otoridad nga isalakan ti biktima ngem naideklara daytoy a dead on arrival iti ospital.
