BAGUIO CITY – Imbilin ti Central Office ti Civil Service Commission (CSC) ti panakaikkaat iti serbisyo ti Municipal Zoning Administrator ti La Trinidad, Benguet kalpasan a kinednganda a guilty daytoy iti maatap a grave misconduct.
Iti innem a panid a desisyon a pinirmaan ni CSC Chairperson Alicia dela Rosa-Bala ken CSC Commissioner Aileen Lourdes Lizada, naibasura ti petition for review nga impila ni La Trinidad Municipal Zoning Administrator Emmerson Tabernero.
Pinasingkedan pay ti CSC Central Office ti desisyon ti CSC-Cordillera a nangkuna a guilty ti opisyal iti ‘conduct prejudicial to the interest of the service’ nupay binaliwanda ti pannusa a maipataw iti daytoy.
Dinakamat ti CSC a guilty ni Tabernero iti grave misconduct ken nasken a madusa iti panakaikkat manipud iti serbisyo, makanselar ti eligibility ken saan a maited ti retirement benefits daytoy.
Nagramot ti kaso manipud iti affidavit-complaint ni Board Member ken Councilor Nestor Fongwan, Jr. idi April 2018 kontra kenni Tabernero a naisumitir sadiay CSC-Cordillera.
Nailanad iti reklamo ti maatap nga iregularidad ken maikaniwas iti linteg nga inaramid ti Zoning Administrator, partikular ti panagdawatna ti kwarta kasukat ti building permit nga ap-aplikaran ti maysa nga indibidual manipud iti Zoning Office nga idadauluanna.
Nupay nainget a pinaglibakan ni Tabernero ti nasao a reklamo, kinedngan ti CSC Central Office a ti nagbalin nga aksion ti opisyal ket maysa a ‘grave misconduct’ gaputa ti inaramidna ket direkta a konektado iti trabahona kas Zoning Administrator.
Mainaig iti daytoy, al-alaen met ti Bombo Radyo Baguio ti dasig ti maseknan nga opisyal.
