Impablaak ti Commission on Elections (Comelec) nga irugida manen ti panagimprenta kadagiti opisial a balota inton Miyerkules, Enero 22, kalpasan ti temporary restraining orders (TRO) nga impaulog ti Korte Suprema kadakuada idi napalabas a lawas.
Itay laeng nabiit, nangipaulog iti temporary restraining orders (TRO) ti Korte Suprema kontra iti Commission on Elections gapu iti desisionda a manglapped iti sumagmamano nga indibidual a makipaset kas kandidato iti 2025 national ken local elections.
Gapu iti dayta, masapul a madadael ti 6 milion a balota nga immun-una a nayimprenta.
Inaklon ni Commission on Election Chairman George Garcia a ti desision ket dakkel a nakaapektar iti timeline para iti panagimprenta kadagiti official ballots ngem kasapulanda nga agtulnog iti pammilin ti Korte Suprema.
Idi napalabas a lawas, kinuna ti Commission on Election a masapul a makaramidda ti agarup 1,667 a baro a ballot page templates, ma-“serialize” dagitoy, ken mangpataud iti innem a milion a nayimprenta a balota.
Kinuna pay ti hepe ti nasao nga ahensia a 71 milion a ballota ket masapul a maipasidong iti manual verification tapno masukimat ti “format,” maris, “size” ken “cut” ti balota.
Mapatta-patta a ti gatad ti maibelleng a balota ket P100 milion.
