Makidkiddaw ti pannakaimuntar ti kanayunan pay nga streetlights ken nasaysayaat a kalidad ti closed circuit television (CCTV) iti munisipyu ti Tublay, Benguet.
Kasaruno ti napasamak a maatap nga insidente ti hold-up wenno robbery with intimidation iti Halsema Highway, Acop, Benguet.
Iti pannakiuman ti Bombo Radyo iti saanen a nagpabigbig a biktima iti napasamak nga insidente, manarimaan ti pannagnana iti kalsada a paawid iti agarup alas-6 ti rabii, idi kellaat nga adda ti maysa a lalaki a mangpilpilit kenkuana nga alaenna ti shoulder bag daytoy ken tinutukanna pay iti improvised nga ‘ice pick.”
Idi damo, linabasan laeng ti suspek ti biktima ngem nagsubli daytoy ken inaramid ti panggepna iti biktima. Ti insidente ket nagbayag iti 10 a minutos.
Naglaon ti shoulder bag iti agarup P5,000, susi ken dadduma pay a banag.
Imbinglay iti biktima a kanayon a magmagna daytoy iti tunggal rabii nga agawid gaputa awan pay ti nadamdamagna a napasamak nga aniaman a saan a nasayaat nga insidente, ken nariknana a “safe” ti aglawlaw. Nupay kasta, saanna a ninamnama a mapasamak kenkuana ti nasao a banag. Iti baet dayta, saan met a nadangran ti biktima.
Ti insidente ket napasamak idi paylaeng Nobiembre 21, 2025 ken asideg iti police station.
Dagos a naireport ti insidente iti kapulisan, ngem iti nagturong dagitoy iti nakapasamakan ti insidente, nasarakanna ti bag na ngem mapukpukaw ti linaon daytoy.
Iti panagdamag ti Bombo NewsTeam, impeksa ti biktima a kasla awan ti nagdur-asan ti imbestigasion ti kapulisan gaputa manu a bulanen ti napalabas.
Iya-Degsi
Sigun ti biktima adda metten ti sumagmamano a gundaway a nagfollow-up ti kapulisan ngem awan pay ti maitudu nga eksakto a suspek.
Kinuna pay ti biktima, a sigun iti nasao nga istasion, addan ti Persons of Interest iti napasamak nga insidente ngem saan a mamati ti biktima a daytoy iti suspek. Kinunana pay nga adu ti itudtudo ti kapulisan a Persons of Interest.
Imbinglay pay ti suspek a dandani talo ti naiparang kenkuana a rupa dagiti maatap a suspek ngem kinumpirmarna a saan a dagitoy iti suspek.
Numan pay adda ti kopia iti CCTV, marigatan dagiti kameng ti pulisia a magbigbig iti rupa ti suspek gaputa saan a nalawag ken “low quality” ti nasao a CCTV video.
Gapu iti dayta, agkidkiddaw daytoy nga agtignay dagiti kameng ti LGU kasta metlaeng dagiti kameng ti kapulisan tapno saanen a maulit pay ti insidente.
Inaklon pay ti biktima a makapaspasar daytoy iti trauma gapu iti napasamak.
Iti agdama, aktibo metten dagiti kameng ti kapulusan ken tanod babaen iti panagrondada. | via Bombo Noveh Organo
