Impakaamo ti Department of Justice (DOJ) ita nga aldaw a nagleppasen ti pannakaipasidong ni sigud a Negros Oriental Representative Arnolfo “Arnie” Teves Jr. iti “extradition trial” idiay Timor Leste idi napalabas a lawas.
Sigun iti nasao nga ahensia, naipaayan ti dua a parrtido a mangisubmitir iti bukodda a position paper kadagiti argumento ken takderda.
Kasaruno daytoy, maaddaan met ti lima nga aldaw ti korte tapno agdesision.
Kinuna ti Department a manamnama a madesisionan daytoy iti ngudo ti Hunio.
Kabayatanna, saan nga immanamong ti abogado ni Teves Jr a ni Attorney Ferdinand Topacio a mangipaay ti assessement iti napasamak a hearing.
Ti pannakaipatungpal ti “trial” iti Court of Appeals idiay Timor Leste ket gapu iti kiddaw ti gobierno ti Pilipinas a maipasubli ni Teves iti Pilipinas gapu iti kasona a pammapatay a naipila kontra kenkuana.
Ngem nupay kasta, pinaglibakan amin daytoy ni Teves Jr.
