Sinuspende ti Land Transportation Office (LTO) ti pannakairehistro dagiti light electric vehicles kas iti e-bikes.
Paset daytoy iti panggep ti nasao nga ahensia a kitaen a naimbag ti kinatalged dagiti e-vehicles, nangruna ita a sumagmamano a lokalidad ti nangipaulog iti bukodda nga ordinansa maipapan iti pannakausar dagiti nasao a lugan.
Sigun kenni Land Transportation Office Chief Vigor Mendoza, pagaayatda a mangaramid iti pagannurotan a pagbasaran ti amin maipapan iti pannakausar dagiti light electric vehicles iti kabiitan a panawen, apaman a mapaneknekan a nasayaat ti epekto dagitoy.
Nupay kasta, inlawlawag ti Land Transportation Office a saan a makaapektar ti kaudian a pammilinda kadagiti ordinansa a maipatpatungpal kadagiti nagduduma a local government units kas kadagiti localidad a mangipawil iti pannakausar dagiti e-vehicles.
Maipagip nga immuna nga insingasing ti nasao nga ahensia ti pannakairehistro dagiti e-vehicles bayat ti konsultasion ti publiko idi Pebrero iti agdama a tawen.
