BAGUIO CITY – Mangrugin inton Lunes, Setyembre 20, ti market schedule iti munisipyo ti La Trinidad kasaruno iti impaulog a pammilin ti Provincial Inter Agency Task Force ti Benguet.
Sigun kenni La Trinidad Mayor Romeo Salda, napagnumuan dagiti kapitan ti tunggal barangay nga isublida ti market schedule mangrugi inton Lunes agingga iti ngudo ti agdama a bulan.
Inlawlawagna a malimitaran iti panaggaraw ti publiko ken babaen iti daytoy ket makaipaay iti dakkel a tulong para iti panagbaba ti kaso ti nasao nga ili iti COVID19.
Kagiddan iti daytoy, kinunana a saanen a market pass ti maiparang kadagiti establishemento sadiay ngem ketdi dagiti Barangay IDs nga ipaay dagiti barangay.
Maibasar iti market day schedule, naituding a market day ti Lunes para laeng kadagiti residente ti Pico ken Bineng; ti Martes para laeng kadagiti residente ti Balili ken Alno; ti Miyerkules para laeng kadagiti residente ti Poblacion, Beckel ken Cruz; ti Hwebes para laeng kadagiti residente ti Tawang, Alapang ken Shilan; ti Biyernes para laeng kadagiti residente ti Puguis, Bahong ken Wangal ken ti Sabado para laeng kadagiti residente ti Betag, Ambiong ken Lubas.
Nailatang met ti Domingo a market day dagiti laeng authorized persons outside of residence (APORs) manipud iti alas-sais ti agsapa agingga ala-una ti malem a sarunuen ti disinfection iti merkado publiko. (with Bombo Janice Juanito)
