Imbinglay ni President Ferdinand ”Bongbong” Marcos Jr. nga awan ti makitana a rason tapno masukatan ni Vice President ken Education Secretary Sara Duterte iti Gabinete daytoy iti baet ti saan a nasayaat a panaglinangenda kenni First Lady Liza Araneta-Marcos.
”Why? I don’t see the reason behind that,” kinunana
Bayat ti ambush interview kenni President Marcos Jr, awan ti aniaman a rason ken inlawlawagna a siasinnoman a Cabinet Secretaries a saanna nga ar-aramiden ti pagrebbenganna ket mabalin a dagos a maikkat daytoy.
”Any of the Cabinet secretaries will be replaced kapag hindi nila ginagawa ‘yung trabaho nila. All the other things are not part of the discussion.” sigun kenni Marcos.
Inayonna pay a nu saan a nalaing ken “corrupt” ti maysa a secretary, ikkatenna daytoy.
“Kapag hindi talaga marunong o corrupt, tatanggalin ka talaga namin. Hindi naman ganoon si Inday,” impaganetget pay ti President.
Itay laeng nabiit, inaklon ti First Lady a nasakit ti riknana kenni Vice President kalpasan nga inawagan ti tatangna, ni sigud a President Rodrigo Duterte, ti asawana a “bangag”.
Inaklonna pay a nakapungtot daytoy idi nakitana ni Vice President nga agkatkatawa iti panang-awag ni sigud a president Rodrigo ti bangag kenni President Marcos bayat ti rally idiay Davao idi Enero.
Idi kalman, Abril 22, binigbig ti Vice President ti pungtot ti First Lady ngem kinuna nga awan ti pakainaigan ti personal a riknana iti mandato ni Duterte kas maikadua a kangatuan nga opisial ti gobierno.
