BAGUIO CITY- Kidkiddawen ti Alliance of Concerned Teachers Cordillera ti pannakasuspendir ti naipangato a PhilHealth contribution a nag-epektibo idi pay Enero ti agdama a tawen.
Sigun kenni Jeanette Cawiding, dadaulo ti nasao a grupo, ngimmato ti binulan a kontribusyon dagiti miembro ti Philippine Health Insurance Corporation.
Kinunana a gapu iti daytoy ket maapektaran dagiti public school teachers ken daduma pay nga empleyado nu maipapan iti komputasyon ti benepisyo dagitoy.
Impettengna nga adda paylaeng ti P15-B a maatap a napukaw ti PhilHealth nga agingga ita ket saanda paylaeng a sinungbatan.
Impaganetget ni Cawiding a risuten koma pay ti nasao nga ahensia ti mapukpukaw a gatad sakbay a mangipangato manen dagitoy iti kontribusyon.
Maipalagip nga inwaragawag ti PhilHealth a nangrugi ti 4% a kanayonan a monthly premium contribution idi pay Enero kas maitunos iti Universal Health Care (UHC) nu sadino mangrugi a makolektar daytoy ita a bulan.
