Manarimaan ti pannakataming ti parikut iti nagbaetan ti Butbut Kalinga ken Betwagan, Sadanga mainaig iti boundary dispute.
Iti pannakiyuman ti Bombo Radyo, kinuna ni Tinglayan Municipal Station Police Captain Luis Balawan Bulao Jr., a napasamak ti insidente iti disputed area iti nagbaetan ti lugar a nakatayan ti maysa a residente idi December 28, 2022.
Kinuna na pay a nasurok dua nga tawenen nga adda ti presenysa dagiti kameng ti Mountain Province Police Mobile Force Company ken kameng ti Kalinga PMFC nga agserserbi kas peace keeping forces iti nagbaetan ti tribu.
Kagiddan dayta umap-apela ti opisyal iti dua nga agsinnumbangir a tribu a denggenda ti dawat ti kapulisan ken umili ti Tinglayan, Sadanga, Betwagan, ken Mt. Province, a kapya ti maitultuloy a maipatungpal tapno maliklikan ti biag a masayang ken pannakadisturbo ti pagilian.
Sigun pay iti opisyal immunan nga adda ti napasamak a peace negotiation iti nagbaetan ti Provincial Local Government Unit ti Mountain Province ken Kalinga.
Kabayatanna, kinunan ni Bulao a maikonkonsidera a generally peaceful ti pagilian gapu ta awan ti nairekord a crime incident iti agdama.//Marinel
