BAGUIO CITY – Ad-adalen ita ti lokal a gobyerno ti Baguio ti aggigiddan a panakawaswas ti building, occupancy ken business permits a naipaay kadagiti 28 a business establishments iti Central Business District a napaay a mangisubli iti parking spaces dagitoy.
Imbilinen ni Mayor Benjamin Magalong ti panangited ti City Buildings and Architecture Office (CBAO) iti paka-ammo kadagiti agtagikua kadagiti pasdek a napaay a mangisubli kas parking area dagiti espasyon a pinagtakderanda ti stalls ken dadduma pay.
Kinuna ni CBAO Officer-in-Charge Architect Johnny Degay nga imbes a paradaan ket pinagbalin dagiti 28 nga establishimiento a commercial stalls a mailabsing iti Presidential Decree 96 wenno iti National Building Code ken kadagiti ordinansa ti siudad.
Impettengna nga amin dagiti nasao a business establishments ket naipaayan iti umdas a pawayway idi pay napalabas nga administrasyon tapnu aksionanda ti panaglabsingda ngem agingga ita ket awan ti uray maysa a nagtungpal.
Tinakderan met ni Mayor Magalong a saanen a baybay-an ti lokal a gobyerno dagiti establishimento nga aglabsing iti linteg isut gapuna nga imbilinnan ti panangirugi ti CBAO iti panakawaswas ti amin a permits dagiti nasao a negosyo iti koordinasyon ti Permits and Licensing Division.
