Impasigurado ni PCapt. Aida Esteban, Operations Officer ti Tuba Municipal Police Station, nga adda dagiti agbambantay kadagiti kalsada iti kanito nga adda dagiti byaheros a mastranded iti daytoy.
Iti exclusive interview ti Bombo Radyo kenkuana, impeksana nga agtaltalinaed a natalged ken awan ti naireport kadakuada a landslide iti munisipyo ti Tuba, kagiddan paylaeng ti mapaspasaran a bagyo.
Kinunana a nag-activate pay dagitoyen iti PEDRA kas panagsagana iti agdama a bagyo a Gener, no sadino amin dagiti counter partda pakairamanan ti Local Government Units, Bureau of Fire Protection, Barangay officials ken amin a volunteers ket nakastandby-da iti kanito nga adda ti saan a mapakpakadaan nga insidente.
Nakasagana metten dagiti kaskenan nga alikamen nga aramaten a pangresponde iti kanito nga adda ti insidente.
Awan met ti inruar ti Tuba mayor iti advisories seknan iti pannakaiparit nga aglangoy kadagiti karayan ngem aniaman nga oras ket mangiruar daytoy gapu paylaeng iti agtultuloy a panagbayakabak ti tudo.
Kabayatanna, adda metten ti naituding ken nakasagana nga agbalin kas evacuation center iti nasao a munisipalidad kas iti Poblacion Gymnasium iti kanito nga adda dagiti kasapulan nga agbakwit.
Iti sabali a bangir, kinuna ti nasao nga opisyal nga adda ti imonmonitor dagitoy a lugar kas iti Ansagan a nabigbig kas risk area.
Malaksid iti dayta, saan latta a maliklikan ti napuskol nga angep kadagiti kalkalsada partikular ita a panagtutudo rason a mapalpalagipan dagiti motorista a tungpalen dagiti precautionary measures.
Adda pay dagiti advisories a naikabil kadagiti kalsada kasta metten dagiti personnel nga agbambantay iti daytoy.
