Sipapannakkel a nagsubli ti Philippine Muay Thai National Team iti pagilian kalpasan a nakaiyawid dagitoy ti uppat a gold medal, lima a silver medal ken maysa a bronze medal iti kaleppas a 2024 IFMA World Senior World Muaythai Championships a naangay idiay Athens, Greece idi Mayo 31 agingga Hunyo 9 iti agdama a tawen.
Iti exclusive interview ti Bombo Radyo kenni Billy Alumno, Headcoach ti Philippine Muay Thai National Team, nakaala amin dagiti atleta ti medalya.
Karaman ditoy ti pananggun-od ni LJ Rafael Yasay, 23-anyos iti balitok a medalya para iti 48 kg. category bayat a bronze medalist ni Islay Erika Bomogao iti 45 kg. category.
Iti Wai kru, gold medalist ni Ariel Ariel Lee Lampacan bayat a silver medalist da Islay Erika Bomogao, Alyssa Kylie Mallari ken LJ Rafael Yasay under kadagiti nagduduma a kategorya iti daytoy.
Para met iti Mai Muay, nagun-od da LJ Rafael Yasay, Kim Ryan Asense, Alyssa Kylie Mallari ken Rhichein Yosorez ti gold medal bayat a silver medalist da Ariel Lee Lampacan, Noel Alabata, Islay Erika Bomogao ken Rudzma Abubakar.
Kinomendaran met ni Alumno ti panaghost ti Greece iti 2024 IFMA World Senior World Muaythai Championships gapu ta organized daytoy iti baet ti napasaran a pakaseknan kas iti problema iti trasportasyon.
Sigun kenni Alumno, makitkitana a ti pagilian a Thailand ken Russia ti dakkel a kalaban iti Muay Thai nga ay-ayam gapu ta dagiti atleta dagitoy ket nainget a supsuportaran ti gobyerno sadiay.
Kabayatanna, kinuna ni Alumno a naipaayan dagiti atleta ti dua agingga tallo a bulan a panaginana dagitoy sakbay nga ituloyda ti panag-ensayoda para iti sumaruno nga ay-ayam dagitoy.//Bombo Mera Pacpacan
