Maidagdagadag ti dagus a panangiwaras ti Department of Transportation(DOTr) iti Php2.5billion fuel subsidy kadagiti driver ti parapubliko a transportasyon.
Dayta ket gapu iti nagsasaruno a panagngato dagiti produkto a petrolyo iti pagilian kadagiti napalpalabas a lawas.
Inlawlawag ni House of Representatives’ Committee on Appropriations Vice Chair Luis Campos Jr. a kaspangarigan nadanun ti sitwasyon a masapolen a maipaay ti nasao a cash assistance, awanen ti rason tapno maitantan pay ti panakairuar ti pondo a nailatang para iti daytoy.
Dinakamat ni Campos a nakalanad iti 2024 General Appropriations Act(GAA) a masapol a maipaay ti subsidy bayat a madanunen ti presyo ti Dubai crude oil ti $80 per barrel iti tallo pulo(30) nga aldaw.
Maipalagip a nangilatang ti gobyerno ti php2.5billion iti 2024 General Appropriations Act(GAA) a maaramat kas fuel subsidy tapno matulungan dagiti driver iti saan a malikliklikan a panagngato ti presyo ti produkto a petrolyo partikular ti gasolina ken diesel.
Immuna metten nga impakaammo ti Department of Budget and Management(DBM) a naipaiman ti nasao a pondo iti Department of Transporation(DOTr).
