BOMBO NEWS ANALYSIS – Inadaptar ti House Committee on Justice and Human Rights ti tallo a resolusyon a mangkidkiddaw iti gobyerno a makikooperar iti imbestigasyon ti International Criminal Court (ICC) iti nadara a kampanya kontra iti iligal a droga kabayatan ti naglabas a Duterte administration.
Impetteng dagiti nasao a komiti a ti panang-adaptarda kadagiti nasao a gakat ket awan pakainaiganna kadagiti personalidad no di ket maipapan iti prinsipyo.
Sigun iti komiti, uray no nagsanud ti Pilipinas manipud iti Rome Statute, nasayaat a maimbestigaran ti kontrobersiyal a drug war iti nagan ti linteg.
Kinunada a mangipakita daytoy nga awan ti mailaksid iti panakaipatungpal ti linteg ken awan ti ilemlimed ti Pilipinas.
Sigun met kenni solicitor general Menardo Guevarra, a nagserbi idi kas justice secretary kabayatan ti naglabas a Duterte administration, awan ti ligal nga obligasyon ti Pilipinas iti International Criminal Court ngem nawaya met ti grupo nga agturong ditoy pagilian para iti imbestigasyon.
Nupay kasta, impettengna nga adda kenni President Ferdinand Marcos Jr. no aprobaranna ti maipasa a resolusyon a mangipalpalubos iti imbestigasyon ti International Criminal Court ditoy pagilian.
Sigun iti rekord ti gobyerno, dumanon iti 6,200 suspects ti iligal a droga ti napapatay kadagiti police operations kabayatan ti naglabas nga administrasyon, ngem ipetpetteng dagiti Human Rights groups a dumanon iti 12,000 agingga iti 30,000 ti bilang dagiti napapatay.
Gapu iti daytoy, rumbeng ngata a maki-kooperar ti Pilipinas iti imbestigasyon ti International Criminal Court seknan iti nadara a drug war iti naglabas nga administrasyon?// Alfred Pudsoc
