BAGUIO CITY – Ad-adalen paylaeng ti Civil Service Commission (CSC) – Cordillera ti kina-epektibo ti Computerized Examination (COMEX) nga ididiaya ti ahensia kas alternatibo ti Paper and Pencil Test gapu iti agdama a pandemya.
Iti panakiuman ti Bombo Radyo Baguio, imbinglay ni CSC-Cordillera OIC Chief HR Specialist Ruby Verceles a nangrugi idi pay napalabas a bulan ti Mayo ti pilot test ti COMEX kadagiti napili nga ahensia ti gobyerno ditoy rehion.
Kinunana nga iti agdama ket manarimaan ti pilot test ti COMEX kadagiti empleyado ti Baguio General Hospital and Medical Center bayat a nalpasen ti COMEX kadagiti empleyado ti lokal a gobyerno ti Baguio City ken Deparment of Education – Cordillera.
Dinakamatna a tarigagayda a maperpekto ti naannayas nga implementasyon ti COMEX nupay iti agdama ket adu pay dagiti nagbalin a parikut.
Impanamnama pay ni Verceles nga apaman a mapaneknekan nga epektibo ti COMEX ket maidiaya daytoy malaksid iti Paper and Pencil Test ken mailukat manen iti publiko dagiti eksaminasyon ti CSC.
