LA TRINIDAD, BENGUET – Nabigbigen ti driver ti 24-wheeler gas tanker a pimmusay kalpasan a naibangga ti imanmanehona iti maysa a warehouse idiay Puguis, La Trinidad, Benguet itay parbangon.
Isuna ket ni Edgar Ocan Bon, 52-anyos, tubo ti Samar bayat a ti nadangran a pahenantena ket ni John Lester Bon Canuto, 22-anyos, tubo ti Mercedes Camarines Norte.
Maipalagip nga itay parbangon ket naidungpar ti 24-wheeler gas tanker iti maysa a warehouse a nangitunda iti dakkel nga uram ken panagbettak.
Iti interview ti Bombo Radyo, kinuna ni Fire Officer 2 Jonathan Pocyao ti BFP-La Trinidad, saan a dagus a nakaruar ti driver agsipud ta naipit daytoy bayat a ti kadwana ket nakatapwak rason a nakalasat.
Gapu iti dakkel nga uram nga intunda ti nasao nga aksidente ket totally- burned ti tallo a pasdek pakairamanan ti auto repair shop, maysa a sari-sari store ken maysa a pagtaengan.
Mapatta-patta a dumanon iti P11,473,000 wenno nasurok 11 million pesos ti pakabuklan a danyos ti napasamak nga uram.
