BAGUIO CITY – Posible a marugian ita a tawen ti panggep ti lokal a gobierno ti siudad a pannakaipasdek ti Sewerage Treatment Plant (STP) sadiay Lower Rock Quarry, Baguio City.
Iti pannakipatang ti Bombo Radyo ken ni Lower Rock Quarry Punong Barangay Benigno Marzan, kinunana a posible nga iti kabiitan a panawen ket maaladan ti 11,000 square meters a lote a panggep a pakaipasdekan ti STP.
Kinunana a panggep ti lokal a gobierno nga aladan ti lugar tapno saanen a makastrek dagiti squatter.
Nupay kasta, kinunana a kaipapanan daytoy a no maaladan ti lugar ket mapapanaw metten dagiti maapektaran a residente.
Sigun pay iti kapitan, addan ti kontraktor para iti proyekto ken posible a maikabil ti marker iti maaladan a paset ti lugar ita a lawas.
Gapu iti daytoy, kinunana nga agsapulda iti relocation site para kadagiti maapektaran a residente nangruna ta desidido ti gobierno a mangituloy iti plano.
Innayon pay ni Marzan a maibasar iti plano, malaksid iti STP ket maipasdek met laeng iti lugar ti basketball court ken pagparadaan.
