BAGUIO CITY – Inlawlawag ti presidente ti Benguet State University (BSU) ti damag a maipakkat dagiti mannalon nga agab-abang iti strawberry farm iti plano a maipaabang ti paset daytoy iti maysa nga kompanya manipod Korea.
Iti interview ti Bombo Radyo Baguio, inaklon ni BSU President Dr. Felipe Comila ti panggep ti Korean International Cooperation Agency nga agabang iti 3 ken kagudwana nga ektarya iti paset ti strawberry farm.
Kinunana a P40 ti isaksakad ti kompanya nga abang tunggal square meters manipod iti P15 a renta dagiti mannalon bayat nga 56 a mannalon ti posible a maapektaran iti masakopda nga ektarya.
Sigun kenkuana, siguden nga adda ti immuna a singasing ti nasao nga kompanya sakbay daytoy a nagtugaw ti pwesto idi 2020 ngem saan a naituloy gaputa saan a nagtunos ti kompanya ken ti boards ti BSU kadagiti terms and conditions.
Inyunay-unayna a saan pay nga pinal ti nasao nga plano ken dumalan iti proseso ken tungtungan ti Komite a pakairaman ti board of regents ti BSU ken dadduma pay a maseknan.
Inkalinteganna pay a saan a mapaikkat dagiti apektado a mannalon iti aniaman a tungtungan iti plano ti Korean company nga agabang iti strawberry farm.
Imbinglayna ti isingsingasing Korea company a maala dagiti apektado a mannalon ken maipaayanda ti saggaysa nga greenhouse ken agserbi kas marketing ti kompanya.
Inayonna pay a mismo a ni DA Secretary William Dar ti nangguyuguy kenkuana nga iyabrasada ti kompanya tapnu maadal ti plano nangruna ti benepisyo daytoy kadagiti mannalon gaputa 30% ti mapataud dagitoy ket agturong iti gobierno.
Naamoan a paset metlaeng ti proyekto ti panakainayonda iti technology transfer iti panagmula ti 4 mula dagiti mannalon iti strawberry farm pakairamanan ti strawberry ken kamatis.
Pinaglibakanna pay ti damag nga impaaynan ti pammalubos iti nasao nga plano ken inyunay-unayna nga adu pay ti proseso a pagdalanan daytoy ken impatalgedna pay nga adalenda ti balanse a pagbenepisyoan ti plano.
