Nagballaag ti Philippine National Police (PNP) kadagiti agtagikua ti kantina kontra kadagiti agilaklako ti iligal a paputok.
Sigun kenni PNP spokesperson Police Brigadier General Jean Fajardo, dagiti agtagikua ti kantina nga aglabsing ket sumango iti pannakakanselar ti permit ken pannakumpiskar ti paputok dagitoy.
Kabayatanna, agtultuloy latta ti cyber patrolling ken random inspection dagiti kameng ti nasao nga ahensia kadagiti physical stores a mangilaklako iti papaputok ken kinunana a kasapulan nga adda ti Philippine Standards marking, nu sadinno kasapulan a nadalan ti quality check iti Department of Trade Industry.
Kinunana pay a nangiruarda metten ti listaan dagiti maipawil a paputok.
Maibasar iti Executive Order 28 and Republic Act 7183, inlistada ti pakabuklan a 28 a maipawil a paputok karaman ti watusi, piccolo, five star, pla-pla, lolo thunder ken dadduma pay.
Iti rekord ti nasao nga ahensia, pakabuklan a 541 nga iligal a paputok nga aggatad ti P14,370 ti nakumpiskar iti tallo nga operasion.
